کراچی: سندھ کے وزیر اطلاعات ناصر حسین شاہ نے پاکستان سپر لیگ (پی ایس ایل) 6 کے میچز ابوظہبی میں کرانے کا کریڈٹ پیپلز پارٹی کو دیدیا جبکہ انہوں نے پی ایس ایل کے انعقاد کی خبر بھی پی سی بی سے پہلے دیدی۔
تفصیلات کے مطابق شائقین کرکٹ کیلئے اچھی خبر تو آ گئی ہے کہ پی ایس ایل کے بقیہ میچز 9 جون سے شروع ہورہے ہیں لیکن وزیر اطلاعات سندھ ناصر حسین شاہ کا کہنا ہے کہ پیپلز پارٹی چاہے حکومت میں ہو یا نہ ہو، پاکستان کیلئے تو ہر وقت حاضر ہے۔
دلچسپ بات یہ ہے کہ پی ایس ایل شیڈول ہونے کی خبر بھی ناصر حسین شاہ نے پاکستان کرکٹ بورڈ (پی سی بی) سے پہلے سوشل میڈیا ویب سائٹ ٹوئٹر پر شیئر کی۔ انہوں نے اپنے پیغام میں کہا ’ابوظہبی میں پی ایس ایل کے انعقاد کی راہ میں حائل تمام رکاٹیں دور ہو گئی ہیں اور انشاءاللہ اگلے پانچ روز میں ٹورنامنٹ کا آغاز ہو جائے گا۔ ابوظہبی حکام ہر طرح سے پی ایس ایل کے انعقاد میں تعاون کریں گے۔
All hurdles in arranging PSL matches in AbuDhabi are sorted out and inshaAllah league will start in next 5 days. Local authorities in Abu Dhabi going all out to support PSL organisers. Good luck PSL
— Syed Nasir Hussain Shah (@SyedNasirHShah) June 3, 2021
مندرجہ بالا ٹویٹ سے تقریباً ایک گھنٹہ قبل بھی انہوں نے ایک ٹویٹ کی اور پی ایس ایل میچز کی راہ میں حائل رکاوٹیں دور کرنے میں مدد کی پیشکش کرتے ہوئے پی سی بی حکام سے کہا تھا کہ اگر وہ چاہیں تو مجھ سے رابطہ کر لیں۔
ان کا کہنا تھا پاکستان کی عزت ہم سب کی عزت ہے۔ میں پی ایس ایل حکام کو آگاہ کرنا چاہتا ہوں کہ ابوظہبی میں پی ایس ایل کے انعقاد کی راہ میں اگر کچھ رکاوٹیں حائل ہیں تو میں اس حوالے سے یو اے ای کے اعلیٰ حکام سے بات چیت کرنے کو تیار ہوں۔ پی سی بی حکام اگر ایسا چاہتے ہیں تو فوری طور پر مجھ سے رابطہ کر لیں۔
Pakistan's respect is the respect of all of us. I would like to inform the PSL authorities that if there are some hurdles in arranging the PSL2021 in Abu Dhabi, I am ready to help and talk to the higher authorities. @TheRealPCB officials can contact me immediately if they want.
— Syed Nasir Hussain Shah (@SyedNasirHShah) June 3, 2021
ان کی ٹویٹ کے بعد معاملہ میڈیا پر آیا تو انہوں نے پی ایس ایل میچز کے ابوظہبی میں انعقاد کا کریڈٹ لینے کا تاثر مسترد کرتے ہوئے کہا کہ ’ہم کوئی کریڈٹ نہیں لے رہے سب پاکستانی ہیں اور پاکستان کی عزت اور کامیابی کیلئے کام کر رہے ہیں۔
ان کا کہنا تھا کہ پی سی بی کی محنت قابل تعریف ہے اور انشاءاللہ پی ایس ایل پوری دنیا میں پاکستان کا سر فخر سے بلند کرے گی۔ چیئرمین بلاول بھٹو زرداری کی قیادت میں ہم ایک متحد اور معتبر پاکستان کی طرف بڑھ رہے ہیں۔
