ریاض : انجینئر کی اچھی خاصی اور معقول ملازمت کرنے والا کوئی شخص کسی معمولی کام کی وجہ سے اپنی ملازمت ترک کر دے تو اس پر حیرت ہی کی جا سکتی ہے۔ سعودی عرب کے ایک شہری نے ایسا ہی کیا۔
عرب نیوز کے مطابق نوجوان مشاری ایک انجینئر تھے مگر انہوں نے ملازمت کو خیر آباد کہہ کر قصاب کا پیشہ اختیار کر کے لوگوں کو حیران کر دیا۔
مشاری کا کہنا ہے کہ مجھے انجینئر کی نوکری چھوڑ کر قصائی کا کام شروع کرنے پر فخر ہے۔ میں اپنے ہاتھوں سے کام کرتا ہوں۔
عام قصابوں سے ہٹ کر مشاری ایک ایسے قصائی ہیں جو صاف ستھرے اجلاے لباس میں رہتے ہیں اور اپنے گاہکوں کو صاف ستھرا گوشت مہیا کرتے ہیں۔
سعودی عرب میں سوشل میڈیا پر اس نوجوان قصاب انجینئر کی ویڈیو بھی وائرل ہے۔ شہریوں نے اس پر ملا جلا رد عمل ظاہر کیا ہے۔ تاہم شہریوں نے مشاری کو مشورہ دیا ہے کہ وہ اپنے پسندیدہ نئے پیشے پر کام جاری رکھیں اورحوصلہ نہ ہاریں۔
مشاری کا کہنا ہے کہ وہ ایک نجی کمپنی میں انجینئر تھے۔ ان کی تنخواہ سے ان کے گھر کے اخراجات پورے نہیں ہوتے تھے۔ اس لیے انہوں نے نوکری چھوڑ کر یہ پیشہ اپنا لیا۔
