لاہور : محکمہ موسمیات نے آج کے لیے ملک کے مختلف حصوں میں بارش اور برفباری کی پیشگوئی کی ہے۔ اس کے مطابق، بالائی خیبر پختونخوا، شمالی بلوچستان، گلگت بلتستان، کشمیر اور ان کے ملحقہ پہاڑی علاقوں میں بارش اور پہاڑوں پر برفباری ہو سکتی ہے۔
پنجاب اور خیبر پختونخوا کے بیشتر میدانی علاقوں اور بالائی سندھ میں دھند چھائے رہنے کا امکان ظاہر کیا گیا ہے۔ اسلام آباد اور اس کے گرد و نواح میں موسم سرد اور جزوی ابر آلود رہنے کی توقع ہے، جب کہ پنجاب کے بیشتر اضلاع میں بھی موسم سرد اور جزوی ابر آلود رہنے کا امکان ہے۔ مری، گلیات اور ان کے اطراف میں بعض مقامات پر بارش اور ہلکی برفباری کی پیشگوئی کی گئی ہے۔
خیبر پختونخوا کے چترال، دیر، سوات، کوہستان، باجوڑ، خیبر، شانگلہ، بونیر، بٹگرام، مانسہرہ اور ایبٹ آباد میں بارش اور برفباری متوقع ہے، جب کہ صوابی، مردان، پشاور، نوشہرہ، کوہاٹ، کرک، کرم اور وزیرستان میں ہلکی بارش ہو سکتی ہے۔
بلوچستان کے بیشتر اضلاع میں موسم سرد اور ابر آلود رہنے کی توقع ہے، تاہم کوئٹہ، چمن، پشین، زیارت، قلعہ عبداللہ، قلعہ سیف اللہ، ژوب، بارکھان، لورالائی، موسیٰ خیل، قلات، پنجگور، تربت، دالبندین، لسبیلہ اور نوکنڈی میں چند مقامات پر بارش اور برفباری ہو سکتی ہے۔
سندھ کے بیشتر اضلاع میں موسم سرد اور خشک رہنے کا امکان ہے، جبکہ کشمیر اور گلگت بلتستان میں موسم شدید سرد اور ابر آلود رہے گا، اور وہاں بارش و برفباری کا بھی امکان ہے۔
