غزہ : غزہ میں اسرائیل کی وحشیانہ بمباری کا سلسلہ بدستور جاری ہے، جس میں تازہ ترین حملوں میں مزید 63 فلسطینی شہید اور درجنوں زخمی ہو گئے ہیں۔ المواصی میں محفوظ قرار دیے گئے علاقے پر بمباری سے بارہ فلسطینی شہید ہو گئے، جب کہ اسرائیل نے خان یونس میں غزہ کے کمانڈ سینٹر کو نشانہ بنانے کا دعویٰ کیا ہے۔
اسرائیلی حملوں میں شہید ہونے والوں کی تعداد 45,581 تک پہنچ چکی ہے۔ اس دوران غزہ میں شدید سردی اور بنیادی سہولتوں کے فقدان کی وجہ سے ایک اور نومولود کی جان چلی گئی ہے، جس کے بعد سردی سے جاں بحق ہونے والے بچوں کی تعداد آٹھ ہو گئی ہے۔
ادھر اسرائیلی فوج نے جنوبی لبنان میں حزب اللہ کے ٹھکانوں پر بھی حملے کیے ہیں۔ اس بدترین صورتحال کے دوران، اسرائیلی وزیراعظم نیتن یاہو نے حماس کے ساتھ جنگ بندی مذاکرات کے لیے وفد تشکیل دے دیا ہے۔ یہ مذاکرات قطر میں ہوں گے اور اسرائیل کی ٹیم میں فوجی اور خفیہ ایجنسیوں کے حکام شامل ہیں۔
