اسلام آباد: اسلام آباد ہائیکورٹ کی انتظامی اور ڈیپارٹمنٹل پروموشن کمیٹیوں میں اہم تبدیلیاں کی گئی ہیں، جبکہ ججز کی نئی سینیارٹی لسٹ بھی جاری کر دی گئی ہے۔
ایڈیشنل رجسٹرار اسلام آباد ہائیکورٹ کی جانب سے جاری نوٹیفکیشن کے مطابق، چیف جسٹس عامر فاروق انتظامی کمیٹی کے چیئرمین ہوں گے، جبکہ سینیئر ججز جسٹس سرفراز ڈوگر اور جسٹس خادم حسین سومرو بھی کمیٹی کے اراکین ہوں گے۔
اسی نوٹیفکیشن کے تحت چیف جسٹس عامر فاروق نے ڈیپارٹمنٹل پروموشن کمیٹی میں بھی تبدیلی کی ہے، جس میں سینیئر پیونی جج جسٹس سرفراز ڈوگر اور جسٹس اعظم خان شامل ہوں گے۔
نئی سینیارٹی لسٹ میں جسٹس سرفراز ڈوگر سینیئر پیونی جج ہیں، جبکہ جسٹس محسن اختر کیانی دوسرے نمبر پر آ گئے ہیں۔ اس کے علاوہ، جسٹس میاں گل حسن اورنگزیب تیسرے، جسٹس طارق محمود جہانگیری چوتھے، اور جسٹس بابر ستار پانچویں نمبر پر ہیں۔
باقی ججز کی سینیارٹی لسٹ میں جسٹس سردار اسحاق خان چھٹے، جسٹس ارباب محمد طاہر ساتویں، جسٹس ثمن رفعت آٹھویں، جسٹس خادم حسین نویں اور جسٹس اعظم خان دسویں نمبر پر ہیں۔ جسٹس آصف گیارہویں اور جسٹس انعام امین منہاس بارہویں نمبر پر ہیں۔