دبئی: معروف اداکارہ صبا قمر، جو کہ گزشتہ ہفتے شدید ڈائریا کا شکار ہو گئی تھیں، اب مکمل صحت یاب ہو چکی ہیں اور دبئی میں ہونے والے اردو ادب کے فیسٹیول 'جشن ریختہ' میں شرکت کے لیے پہنچ گئیں۔
صبا قمر کی جشن ریختہ میں شرکت کی ویڈیوز سوشل میڈیا پر وائرل ہو گئی ہیں، جن میں وہ خوش و خرم اور مکمل صحت یاب دکھائی دے رہی ہیں۔ اس فیسٹیول کے دوران انہوں نے ایک سیشن میں بطور مہمان شرکت کی اور اپنے شوبز کیریئر پر کھل کر بات کی۔
اداکارہ نے دوران گفتگو اپنی زندگی کو بھارتی فلم ساز امتیاز علی کی فلموں کی طرح "نامکمل" قرار دیا، اور کہا کہ امتیاز علی کی فلموں کی طرح ان کی زندگی بھی کبھی مکمل نہیں ہوتی۔
صبا قمر نے مزید کہا کہ اب وہ یہ سمجھنے لگی ہیں کہ "ادھورے پن" کا بھی اپنا الگ مزہ ہے، کیونکہ مکمل ہونے کی خواہش انسان کی سکون کو چھین لیتی ہے۔ انہوں نے کہا کہ "ادھورے پن کا درد ہوتا ہے لیکن اس میں ایک خاص لطف ہے اور اب مجھے اتنا زیادہ درد نہیں ہوتا۔
صبا قمر کی صحت یابی کے بعد ان کے مداحوں نے سوشل میڈیا پر خوشی کا اظہار کیا اور ان کے لیے نیک خواہشات کا پیغام دیا۔ اس سے پہلے، اداکارہ نے اپنی بیماری کے دوران انسٹاگرام پر اپنے مداحوں کو آگاہ کیا تھا کہ وہ شدید ڈائریا کا شکار ہو گئی تھیں اور اس وجہ سے وہ سوشل میڈیا سے غیر فعال رہی تھیں۔اب صحت یاب ہو کر دبئی میں ہونے والے اس ادب فیسٹیول میں شرکت کرنا صبا قمر کے مداحوں کے لیے خوشی کا باعث بن گیا ہے۔