غزہ : غزہ جنگ بندی معاہدے کے باوجود اسرائیلی فوج کی جارحیت کا سلسلہ مغربی کنارے میں جاری ہے۔ عرب میڈیا کے مطابق اسرائیلی فورسز نے مغربی کنارے میں ایک نوجوان اور ایک معمر شخص کو شہید کر دیا، جبکہ جنین کیمپ میں 23 گھروں کو دھماکے سے تباہ کر دیا گیا۔ دھماکوں کی وجہ سے جنین کے سرکاری ہسپتال کو بھی شدید نقصان پہنچا۔
میڈیا رپورٹس کے مطابق جنگ بندی معاہدے کے بعد مغربی کنارے میں اسرائیلی فوج کے حملوں میں 27 فلسطینی شہید ہو چکے ہیں۔ اسرائیلی فوج نے جنین میں کارروائی کرتے ہوئے 15 ہزار فلسطینیوں کو بے گھر کر دیا ہے۔
حماس نے اسرائیل کی کارروائیوں پر شدید ردعمل ظاہر کرتے ہوئے کہا کہ مغربی کنارے میں گھروں کو تباہ کرنا جنگ جاری رکھنے کا واضح اشارہ ہے۔ حماس نے اسرائیلی کارروائیوں کو مجرمانہ اقدام قرار دیتے ہوئے عالمی برادری کی خاموشی پر تشویش کا اظہار کیا ہے، اور کہا ہے کہ اسرائیل کے جنگی جرائم کا سلسلہ اسی خاموشی کی وجہ سے جاری ہے۔
