محکمہ موسمیات نے ملک کے مختلف علاقوں میں تیز ہواؤں کے ساتھ بارش اور برفباری کی پیشگوئی کی ہے۔ محکمہ موسمیات کے مطابق، آج ملک کے بیشتر علاقوں میں موسم سرد اور خشک رہے گا، تاہم شمال مغربی بلوچستان میں ہلکی بارش اور پہاڑوں پر برفباری کا امکان ہے۔
خیبر پختونخوا اور گلگت بلتستان کے بعض حصوں میں بھی ہلکی بارش اور برفباری متوقع ہے۔ اسلام آباد اور اس کے گرد و نواح میں موسم سرد اور خشک رہنے کی توقع ہے۔
بلوچستان کے بیشتر اضلاع میں سرد اور خشک موسم ہوگا، تاہم شمالی اضلاع میں شدید سردی رہے گی۔ شمال مغربی اضلاع میں جزوی طور پر ابرآلود موسم کے ساتھ کوئٹہ، زیارت، پشین، ژوب، مستونگ، چاغی اور قلات میں چند مقامات پر تیز ہواؤں کے ساتھ ہلکی بارش اور برفباری کا امکان ہے۔
پنجاب کے زیادہ تر علاقوں میں سرد اور خشک موسم رہے گا، جبکہ مری، گلیات اور گرد و نواح میں شدید سردی متوقع ہے۔ سندھ کے زیادہ تر علاقوں میں موسم خشک اور سرد رہے گا۔
خیبر پختونخوا کے بیشتر اضلاع میں موسم سرد اور خشک رہنے کی توقع ہے، تاہم رات کے اوقات میں چترال، دیر، سوات، کوہستان، بٹگرام، خیبر اور باجوڑ میں جزوی طور پر ابرآلود موسم کے ساتھ چند مقامات پر ہلکی بارش اور پہاڑوں پر برفباری متوقع ہے۔ کشمیر اور گلگت بلتستان میں شدید سردی کے ساتھ جزوی طور پر ابرآلود موسم رہنے کی پیشگوئی کی گئی ہے۔
