قاہرہ: عرب ممالک نے امریکی صدر ڈونلڈ ٹرمپ کے فلسطینیوں کو اپنی سرزمین سے جبری بے دخل کرکے مصر اور اردن منتقل کرنے کے منصوبے کو مسترد کردیا ہے۔
یہ فیصلہ گزشتہ روز مصری دارالحکومت قاہرہ میں ہونے والے ایک اجلاس میں کیا گیا، جس میں سعودی عرب، یو اے ای، مصر، قطر، اردن کے وزرائے خارجہ اور فلسطینی اتھارٹی کے حکام نے شرکت کی۔اجلاس میں عرب لیگ نے فلسطینیوں کی اپنی زمین سے جبری بے دخلی کو ناقابل قبول قرار دیا اور غزہ کے لوگوں کو اردن اور مصر منتقل کرنے کے ٹرمپ کے منصوبے کو مسترد کردیا۔
وزرائے خارجہ کے اجلاس کے بعد جاری کردہ مشترکہ بیان میں غزہ جنگ بندی معاہدے پر مکمل عملدرآمد کی اہمیت پر زور دیا گیا، اور دو ریاستی حل کے لیے امریکی صدر ٹرمپ کے ساتھ مل کر کام کرنے کا عہد کیا گیا۔ اس کے ساتھ ساتھ اسرائیلی فوج سے غزہ پٹی خالی کرنے کا بھی مطالبہ کیا گیا۔
یاد رہے کہ اقوام متحدہ کے سیکرٹری جنرل انتونیو گوتریس نے اس سے قبل فلسطینیوں کو غزہ پٹی سے نکالنے کو نسل کشی کے مترادف قرار دیا تھا۔