لاہور : پنجاب کے میدانی علاقوں میں شدید دھند کے باعث موٹروے پولیس نے کئی مقامات پر موٹروے کو بند کردیا ہے۔ ترجمان موٹروے پولیس کے مطابق، موٹروے ایم 2 لاہور سے ہرن مینار اور ایم 3 فیض پور سے سمندری تک بند کر دی گئی ہے۔ لاہور سیالکوٹ موٹروے ایم 11 پر بھی ٹریفک کا داخلہ روک دیا گیا ہے۔
محکمہ موسمیات کے مطابق، شہر کا کم سے کم درجہ حرارت 10 ڈگری سینٹی گریڈ جبکہ زیادہ سے زیادہ 22 ڈگری سینٹی گریڈ تک جانے کا امکان ہے۔ شہر میں ہوا میں نمی کا تناسب 98 فیصد تک ریکارڈ کیا گیا، جب کہ ہوا کی رفتار پانچ کلومیٹر فی گھنٹہ ہے۔
دوسری جانب، محکمہ موسمیات نے ملک کے بیشتر علاقوں میں موسم سرد اور خشک رہنے کی پیش گوئی کی ہے۔ بلوچستان، خیبرپختونخوا اور گلگت بلتستان میں بارشوں کا امکان ہے۔ آئندہ 24 گھنٹوں میں کوئٹہ، زیارت، پشین، قلات، نوشکی، گودار اور تربت میں بارشیں متوقع ہیں۔ اس کے علاوہ، چترال، دیر، سوات، کوہستان، کرم اور باجوڑ میں بھی بارش کی پیش گوئی کی گئی ہے۔