اسلام آباد: آن لائن سروسز، آن لائن خریداری، مختلف کمپنیوں کو دیئے جانے والے کوائف اب محفوظ رہیں گے اور لیک ہونے کا کسی قسم کاخطرہ نہیں ہوگا اس کے لیے ای سیفٹی بل کا مسودہ تیار کرلیاگیا ہے۔
ای سیفٹی بل کا ابتدائی مسودہ تیار کر لیا گیا۔ صارفین کے تحفظ کیلئے مجوزہ ای سیفٹی بل کا مسودہ عوامی آراء کے حصول کیلئے وزارت آئی ٹی کی ویب سائٹ پر اپ لوڈ کر دیا گیا ہے۔
ای سیفٹی بل کے مسودے پر سٹیک ہولڈرز اور عوام کی جانب سے آراء و تجاویز 7 اگست تک دی جاسکتی ہیں۔ ای سیفٹی بل کا مقصد پاکستان میں تمام قسم کی آن لائن سروسز، آن لائن خریداری، مختلف کمپنیوں کو دیئے جانے والے کوائف کا تحفظ ہے۔
سماجی رابطوں کی ویب سائٹس پر صارفین کے ڈیٹا کو محفوظ کرنے اور اس کے بغیر اجازت استعمال کی روک تھام مقصد ہے، بل کی منظوری کے بعد آن لائن ہراسمنٹ، سائبر بلنگ، بلیک میلنگ جیسے گھناؤنے جرائم کو موثر طریقے سے روکا جا سکے گا۔وفاقی کابینہ نے وزارتِ انفارمیشن ٹیکنالوجی کی سفارش پر 26 جولائی کو ای سیفٹی بل کی اصولی منظوری دی تھی۔
