ریاض: سعودی عرب میں طلبا کو ہدایت کی گئی ہے کہ وہ 8 اگست سے قبل ویکسین کی پہلی خوراک لگوالیں۔
عرب میڈیا کی رپورٹ کے مطابق سعودی وزارت صحت کا کہنا ہے کہ طلبا 8 اگست سے قبل کورونا ویکسین کی پہلی خوراک حاصل کرلیں تاکہ دوسری خوراک نیا تعلیمی سال شروع ہونے سے قبل لگائی جاسکے۔
وزارت نے کہا کہ یہ اقدام سعودی معاشرے کو نئے کورونا وائرس کے مسائل سے بچانے اور وبا کو روکنے کے لیے ضروری ہے، ان دنوں مملکت کے تمام سینٹرز میں ویکسین کی سہولت مہیا ہے۔
سعودی وزارت صحت نے مشورہ دیا ہے کہ لوگ کسی بھی وقت 937 سینٹر سے ویکسین کے حوالے سے معلومات اور مشاورت حاصل کرسکتے ہیں۔
یاد رہے کہ گزشتہ روز سعودی وزارت تعلیم کا کہنا تھا کہ مملکت میں بارہ سال سے زیادہ عمر کے طلبا کو بھی ویکسین کی دوسری خوراک لگائی جائے گی۔
وزارت نے بتایا تھا کہ محکمہ صحت کے تعاون سے تدریسی عملے سمیت طلبا کو دو خوراکیں دینے کا عمل شروع کیا گیا ہے، اسکولوں میں حاضری کے لیے ویکسین کی دونوں خوراکیں شرط ہیں۔