کراچی :اسٹیٹ بینک نے کورونا کے خلاف جنگ کیلئے ہسپتالوں اور میڈیکل سینٹرز کو رعایتی قرض کی حد 20کروڑ روپے سے بڑھا کر 50 کروڑ روپے کردی۔
پہلے بینک ہسپتالوں اور میڈیکل سینٹرز کو صرف 20 کروڑ روپے قرض دے سکتے تھے لیکن اب مرکزی بینک نے اس کی حد کو بڑھادیا ہے۔
اسٹیٹ بینک اعلامیے کے مطابق کمرشل بینکوں کو اس مد میں صفر شرح سود پر پیسہ فراہم کیا جائےگا جبکہ بینک زیادہ سے زیادہ 3 فیصد شرح سود پر یہ قرض ہسپتالوں اور میڈیکل سینٹرز کو دے سکیں گے۔
بینکوں کے پاس 23 اسپتالوں کی 3 ارب 60 کروڑ روپے کی درخواستیں زیر غور ہیں تاہم مرکزی بینک نے 11 اسپتالوں کیلئے اس مد میں 2 ارب 20 کروڑ روپے منظور کرلیے ہیں۔
خیال رہے کہ اسٹیٹ بینک کی جانب سے ایک ماہ کے دوران شرح سود میں 4 اعشاریہ 25 فیصد کمی کی جاچکی ہے۔اس کے علاوہ اسٹیٹ بینک نے کورونا وائرس کے حوالے سے جاری لاک ڈان میں ملازمین کو تنخواہوں کی ادائیگی کیلئے قرض اسکیم بھی متعارف کرائی ہے۔