اسلام آباد : عالمی مالیاتی فنڈ (آئی ایم ایف) کا وفد کل پاکستان پہنچے گا تاکہ اقتصادی جائزہ لے سکے۔ ذرائع وزارت خزانہ کے مطابق آئی ایم ایف کیساتھ اقتصادی جائزہ مذاکرات 15 مارچ تک جاری رہیں گے۔ مذاکرات کے پہلے مرحلے میں تکنیکی سطح پر بات چیت ہوگی جبکہ دوسرے مرحلے میں پالیسی سطح کے مذاکرات ہوں گے۔
آئی ایم ایف کا 9 رکنی وفد نیتھن پورٹر کی قیادت میں تقریباً دو ہفتے پاکستان میں قیام کرے گا۔ یہ وفد آئندہ مالی سال 2025-26 کے بجٹ کے لیے تجاویز بھی فراہم کرے گا، اور آئی ایم ایف کی رضامندی کی صورت میں ہی تنخواہ دار طبقے کو ریلیف فراہم کیا جا سکے گا۔
آئی ایم ایف وفد کے مذاکرات وزارت خزانہ، وزارت توانائی، منصوبہ بندی اور سٹیٹ بنک کے ساتھ ہوں گے۔ ذرائع کے مطابق آئی ایم ایف وفد کے ایف بی آر، اوگرا، نیپرا سمیت دیگر اداروں اور وزارتوں کے ساتھ بھی مذاکرات شیڈول ہیں، اور پنجاب، سندھ، خیبرپختونخوا اور بلوچستان کے نمائندوں سے الگ الگ بات چیت کی جائے گی۔