لاہور : پاکستانی اردو ادب کے معروف شاعر ناصر کاظمی کو ہم سے بچھڑے 53 برس ہو گئے۔ ناصر کاظمی کو جدید اردو غزل کے بنیاد سازوں میں شمار کیا جاتا ہے۔
ناصر کاظمی 8 دسمبر 1925ء کو انبالہ، بھارت میں پیدا ہوئے، اور ان کا اصل نام سید ناصر رضا کاظمی تھا۔ ابتدائی تعلیم انبالہ میں حاصل کرنے کے بعد، ناصر کاظمی نے گورنمنٹ کالج لاہور میں داخلہ لیا لیکن تقسیم ہند کے بعد وہ بی اے مکمل نہ کر سکے۔
اپنے شعری سفر کا آغاز ناصر کاظمی نے اختر شیرانی کے اُسلوب میں رومانی نظمیں لکھ کر کیا، پھر وہ غزل کی طرف آئے اور کئی اہم شعری مجموعے تخلیق کیے۔ ان کے مشہور مجموعوں میں "برگ نے"، "دیوان"، "پہلی بارش"، "نشاط خواب"، "اعتبار نغمہ"، اور "خشک چشمے کے کنارے" شامل ہیں۔ ناصر کاظمی مختلف ادبی جرائد کے مدیر بھی رہے اور پھر ریڈیو پاکستان لاہور سے وابستہ ہوگئے، جہاں وہ آخر تک کام کرتے رہے۔
ناصر کاظمی 2 مارچ 1972ء کو معدے کے کینسر کے باعث انتقال کر گئے، لیکن ان کی غزلیں آج بھی اردو ادب میں زندہ ہیں اور سننے والوں کے دلوں میں رس گھولتی ہیں۔ ان کی تخلیقات اردو شاعری کی ایک روشن علامت ہیں۔
