ممبئی: بھارتی پولیس نے آنجہانی گلوکار سدھو موسے والا کے قتل کے بعد بالی ووڈ سپر اسٹار سلمان خان کی سکیورٹی میں اضافہ کردیا۔
بھارتی میڈیا کے مطابق سدھو موسے والا کے قتل کے بعد خدشہ ہے کہ اب گینگسٹر لارینس بشنوئی کے نشانے پر سلمان خان ہیں، اسی لیے اداکار کی سکیورٹی سخت کردی گئی ہے۔
ممبئی پولیس کے ترجمان نے میڈیا سے بات کرتے ہوئے بتایا کہ سلمان خان کے گھر کے اطراف بھی سخت سکیورٹی کا مکمل انتظام کردیا گیا ہے اور اداکار کے گھر کو مسلسل مانیٹر کیا جارہا ہے۔
واضح رہے کہ پنجابی گلوکار سدھو موسے والا کے قتل کی ذمہ داری قبول کرنے والے گینگ کے سرغنہ لارینس بشنوئی نے چند سال قبل سلمان خان کو بھی قتل کرنے کی دھمکی دی تھی۔
