لاس ویگاس : امریکا کے شہر لاس ویگاس میں ٹرمپ انٹرنیشنل ہوٹل کے باہر ٹیسلا کے سائبر ٹرک میں دھماکا ہوگیا جس کے نتیجے میں ایک شخص ہلاک اور سات افراد زخمی ہوگئے۔ پولیس کے مطابق، بدھ کے روز سائبر ٹرک ہوٹل کے شیشے کے دروازے کے سامنے کھڑا تھا کہ اچانک دھماکا ہوا اور گاڑی میں آگ لگ گئی۔
پولیس رپورٹ کے مطابق، ہلاک ہونے والا شخص سائبر ٹرک کے اندر موجود تھا، جبکہ زخمی ہونے والے سات افراد کو ہلکی چوٹیں آئیں۔ دھماکے کے بعد ٹیسلا کے مالک ایلون مسک نے سوشل میڈیا پلیٹ فارم "ایکس" پر بیان جاری کیا، جس میں انہوں نے کہا کہ "ایسا پہلے کبھی نہیں دیکھا، دھماکا آتشبازی یا بم کی وجہ سے ہو سکتا ہے۔"
ایلون مسک نے مزید کہا کہ سائبر ٹرک میں دھماکا ممکنہ طور پر دہشت گردی کی کارروائی ہو سکتی ہے، اور ان کی سینیئر ٹیم اس واقعے کی تحقیقات کر رہی ہے۔ دوسری جانب، امریکی حکام نے بھی دھماکے کو دہشت گردی کے حملے کے طور پر تحقیقات کرنے کا آغاز کر دیا ہے۔ وائٹ ہاؤس کی جانب سے بھی واقعے پر ردعمل آیا ہے اور صدر جو بائیڈن کو دھماکے کے بارے میں آگاہ کیا گیا ہے، جنہوں نے ہر قسم کی امداد کی پیشکش کی ہے۔ اس واقعے کے بعد لاس ویگاس میں سیکیورٹی بڑھا دی گئی ہے اور تحقیقات جاری ہیں۔
