اسلام آباد: احسن اقبال نے مطالبہ کیا ہے کہ الیکٹرانک ووٹنگ مشینوں کے معاملے پر تمام سیاسی جماعتوں کو اعتماد میں لیا جائے، کیسے پتہ چلے گا کہ کسی ای وی ایم کا سافٹ ویئر تبدیل نہیں ہوا۔
پاکستان مسلم لیگ ن کے وفد نے چیف الیکشن کمشنر سکندر سلطان راجہ سے ملاقات کی اور تحریری شکایات جمع کروا دیں۔
چیف الیکشن کمشنر سے ملاقات کے بعد میڈیا سے گفتگو میں سابق وفاقی وزی ریلوے سعد رفیق نے کہا کہ حکومت نے وزیراعظم عمران خان کی ہدایت پر الیکشن چوری کرنے کا منصوبہ بنایا ہے۔ چیف الیکشن کمشنر کو تحریری شکایات جمع کروا دی ہے۔
ن لیگی رہنما نے کہا کہ وزیراعظم عمران خان نے گورنر ہاؤس میں بیٹھ کر آزاد امیداروں کو پی ٹی آئی کے حق میں بٹھایا۔ کنٹونمنٹ انتخابات کے لیے حکومت نے خزانے کے منہ کھول دیے ہیں اور حکمراں ووٹرز کو رشوت دینے کی کوشش کر رہے ہیں۔
سعد رفیق نے یہ بھی کہا کہ اس بار وزیر اعظم اور ان کے ساتھی ووٹ پر ڈاکا نہیں ڈال سکیں گے، ہم الرٹ ہیں، حکومت نے مینڈیٹ چوری کرنے کی کوشش کی تو رد عمل آئے گا۔
لیگی رہنما احسن اقبال نے مطالبہ کرتے ہوئے کہا ہے کہ الیکٹرانک ووٹنگ مشینوں کے معاملے پر تمام سیاسی جماعتوں کو اعتماد میں لیا جائے، کیسے پتہ چلے گا کہ کسی ای وی ایم کا سافٹ ویئر تبدیل نہیں ہوا۔
اس سے قبل مشیر پارلیمانی امور بابر اعوان نے وزیراعظم عمران خان کے معاون خصوصی کے ہمراہ پریس کانفرنس کرتے ہوئے کہا لیگی رہنماؤں نے آنیوالے الیکشن سے متعلق واویلا شروع کر دیا ہے اور اپوزیشن نے گلگت بلتستان، آزاد کشمیر میں شکست پر دھاندلی کا واویلا کیا تھا لیکن موجودہ حکومت نے اداروں سے لڑنے کا رواج ختم کر دیا ہے اور قانون سازی کے نام پرعدلیہ کیخلاف کوششوں کو حکومت روکے گی ۔
ان کا مزید کہنا تھا کہ نواز شریف اپنے پاؤں پر کلہاڑا مار کر اداروں سے لڑ پڑتے تھے دھاندلی کیلئے مربوط نظام مرتب کیا گیا جو رپورٹ میں موجود ہے اور کنٹونمنٹ بورڈ الیکشن صاف اور شفاف ہوں گے جبکہ الیکٹرانگ مشین ہر کمیٹی میں دکھانے کیلئے تیار ہیں اور اگلے الیکشن میں الیکٹرانک ووٹنگ مشین استعمال ہو گی جبکہ اوورسیز پاکستانیوں کو ووٹ کا حق ملنا چاہیے اور 2021 میں قانون سازی کا عمل پورا کریں گے۔
بابر اعوان نے کہا کہ ڈسکہ کا الیکشن جیت جائیں تو زندہ باد کا نعرہ لگاتے ہیں لیکن جہاں ہار جاتے ہیں تو دھاندلی کا شور مچاتے ہیں۔ 2013 میں عمران خان نے جن حلقوں کا کہا وہاں 100 فیصد دھاندلی ثابت ہوئی
اس موقع پر شہباز گل نے کہا اگلاالیکشن صاف اورشفاف ہو گا جبکہ ووٹنگ مشین استعمال ہو گی اور ووٹنگ مشین سے متعلق جو خدشات ہیں وہ دور کرنے کیلئے تیار ہیں۔ مریم نواز اور شہباز شریف کو تنقید کا نشانہ بناتے ہوئے انہوں نے کہا مریم نواز نے آج عدالت کے اندر جلسہ کرنے کی کوشش کی جبکہ شہباز شریف پیغام بھیجتے ہیں کہ مجھے ای وی ایم سمیت ہر چیز قبول ہے بس صرف این آر او دیں۔