مستونگ: بلوچستان کے ضلع مستونگ میں آج صبح سول ہسپتال اور گرلز سکول چوک پر پولیس موبائل کے قریب ایک دھماکہ ہوا، جس کے نتیجے میں 5 سکول بچوں سمیت 7 افراد جاں بحق ہوگئے۔ اس دھماکے میں 33سے زائد افراد زخمی بھی ہوئے ہیں۔
حکام کے مطابق یہ دھماکہ تقریباً 8 بجکر 35 منٹ پر ہوا۔ ابتدائی تحقیقات سے پتہ چلا ہے کہ دھماکا خیز مواد ایک موٹرسائیکل میں نصب تھا۔ ہلاکتوں کی تصدیق ہونے کے ساتھ ہی 33زخمیوں کو نواب غوث بخش میموریل ہسپتال اور سول ہسپتال میں طبی امداد فراہم کی جا رہی ہے۔
زخمیوں میں سے 6 کی حالت تشویشناک ہے، جنہیں بہتر علاج کے لیے کوئٹہ منتقل کیا جا رہا ہے۔ حکام نے اس واقعے کی تحقیقات شروع کر دی ہیں تاکہ ذمہ داران کا پتہ چلایا جا سکے۔
