دورہ انگلینڈ، قومی ویمن کرکٹ ٹیم کا اعلان، ندا ڈار کپتان برقرار

کراچی :دورہ انگلینڈ کے لیے قومی ویمن کرکٹ ٹیم کا اعلان کردیاگیا ہے۔ سکواڈ میں  ندا ڈار کپتان برقرار رکھاگیا ہے۔  ویسٹ انڈیز ویمن ٹیم کے خلاف ون ڈے سیریز میں شامل سدرہ نواز ٹیم سے باہر ہو گئیں۔
دورہ انگلینڈ کے لیے پاکستان ویمن سکواڈندا ڈار (کپتان)، عالیہ ریاض، عائشہ ظفر، ڈیانا بیگ، فاطمہ ثناء، گل فیروزہ، منیبہ علی (وکٹ کیپر)، ناجیہ علوی (وکٹ کیپر)، نشرہ سندھو، نتالیہ پرویز، رامین شمیم، صدف شمس، سعدیہ اقبال، سدرہ امین، طوبہ حسن، ام ہانی اور وحیدہ اختر پر مشتمل ہے۔
دورے میں پاکستان ویمن ٹیم 9 مئی کو ٹی20 وارم اَپ میچ سی سی بی ڈویلپمنٹ الیون سے کھیلے گی، 11 مئی کو پہلا ٹی20 برمنگھم، 17 مئی کو دوسرا میچ نارتھمپٹن اور 19 مئی کو تیسرا میچ لیڈز میں طے ہے۔اسی طرح، 21 مئی کو ون ڈے وارم اَپ میچ سی سی بی ڈویلپمنٹ سے نارتھمپٹن میں طے ہے جبکہ 23 مئی کو پہلا ون ڈے، ڈربی، 26 مئی کو دوسرا ون ڈے ٹاونٹن اور 29 مئی کو تیسرا ون ڈے چیلمسفورڈ میں کھیلا جائے گا۔
ویسٹ انڈیز ہی کے خلاف ٹی 20 ٹیم کا حصہ بننے والی تین کھلاڑی عائشہ ظفر، گل فیروزہ اور رامین شمیم کا بھی انتخاب ہوگیا۔ سابق قومی کپتان اور سینیئر بیٹر بسمہ معروف پہلے ہی ون ڈے سیریز کے بعد اچانک ٹی20 سیریز سے دستبردار ہو کر انٹرنیشنل کرکٹ سے ریٹائرمنٹ کا اعلان کر چکی ہیں۔
پی سی بی نے پہلی مرتبہ ویمن سیریز کے لیے خاتون چیف سیکیورٹی افسر کو تعینات کیا ہے، پاکستان ویمن کرکٹ ٹیم دورہ انگلینڈ میں 11 تا 17 مئی کے درمیان تین ٹی20 جبکہ 23 تا 29 مئی کے درمیان تین ون ڈے میچز کھیلے گی۔
ون ڈے مقابلے آئی سی سی ویمنز چیمپیئن شپ 2022-25 کا حصہ ہیں۔