لاہور: پاکستان کرکٹ ٹیم کے مایہ ناز سابق کپتان اور جارح مزاج آل راؤنڈر شاہد خان آفریدی نے گزشتہ سال ہونے والے پاکستان انٹرنیشنل ائیر لائنز (پی آئی اے) طیارے حادثے کے لواحقین کے حقوق کیلئے آواز اٹھا دی ہے۔
تفصیلات کے مطابق شاہد خان آفریدی نے سوشل میڈیا ویب سائٹ ٹوئٹر پر کراچی میں پاکستان انٹرنیشنل ایئرلائن (پی آئی اے ) کے طیارے پی کے 8303 میں جاں بحق ہونے والوں کے لواحقین سے ملاقات کی ایک تصویر شیئر کی اور لکھا ’پی آئی اے 8303 طیارہ حادثے کے شکار افراد کے اہل خانہ پہلے ہی اپنے پیاروں کا نقصان برداشت کر رہے ہیں۔ ‘
شاہد آفریدی نے کہا کہ ان کیلئے اعلان کردہ واجبات ایک سال گزر جانے کے بعد بھی انہیں نہ ملنا ان کی پریشانی کو مزید بڑھا رہا ہے، میری ارشاد ملک، پی آئی اے حکام اور وزیراعظم عمران خان سے اپیل ہے کہ وہ اس معاملے پر غور کریں تاکہ لواحقین کے دکھ کا کچھ مداوا ہوسکے۔
Families of the victims of PIA 8303 plane crash are already bearing the loss of their loved ones. Not clearing the dues furthermore exacerbates their situation. Requesting Arshad Malik, @Official_PIA @ImranKhanPTI to look into this matter & to help alleviate their pain pic.twitter.com/S4O1XducaL
— Shahid Afridi (@SAfridiOfficial) June 30, 2021
واضح رہے کہ 22 مئی 2020 کو پی آئی اے کا لاہور سے کراچی آنے والا طیارہ رن وے سے چند سیکنڈ کے فاصلے پر آبادی پر گر کر تباہ ہوگیا تھا جس کے نتیجے میں جہاز کے عملے سمیت 97 افراد جاں بحق ہوئے جبکہ 2 افراد معجزانہ طور پر بچ گئے تھے۔
