راولپنڈی: پاک بحریہ نے شمالی بحیرہ عرب میں ایک اور کامیاب آپریشن کے دوران 10 لاکھ امریکی ڈالر مالیت کی منشیات کی بڑی کھیپ ضبط کرلی ہے۔
پاک فوج کے شعبہ تعلقات عامہ (آئی ایس پی آر) کے مطابق، پی این ایس معاون نے نیول فضائی اثاثوں کی مدد سے مشکوک کشتی پر بورڈنگ آپریشن کیا، جس میں منشیات کے خفیہ خانوں سے بڑی مقدار میں منشیات برآمد کی گئی۔ یہ منشیات بین الاقوامی مارکیٹ میں تقریباً 10 لاکھ امریکی ڈالر کی مالیت رکھتی ہیں اور سمندر کے راستے غیر قانونی طور پر مختلف مقامات تک پہنچانے کی کوشش کی جا رہی تھی۔
آئی ایس پی آر نے کہا کہ پاک بحریہ خطے کی سمندری حدود میں غیر قانونی سرگرمیوں کی روک تھام کے لیے ہمہ وقت تیار ہے اور اس قسم کے آپریشنز اس کے عزم کا حصہ ہیں۔
یہ آپریشن پاک بحریہ کے گزشتہ سال اکتوبر میں شمالی بحیرہ عرب میں کمبائنڈ ٹاسک فورس 150 کے ساتھ کیے گئے انسداد منشیات آپریشن کا تسلسل ہے، جس میں ایک مشتبہ کشتی سے 1300 کلو حشیش برآمد کی گئی تھی، جس کی عالمی مارکیٹ میں مالیت 2 کروڑ 60 لاکھ ڈالر تھی۔
پاک بحریہ کی یہ کامیابیاں نہ صرف سمندری حدود میں سکیورٹی کو مستحکم کرنے میں مددگار ثابت ہو رہی ہیں، بلکہ عالمی سطح پر منشیات کی سمگلنگ کو روکنے کی کوششوں میں بھی اہم کردار ادا کر رہی ہیں۔
