لاہور : وزیراعلیٰ پنجاب مریم نواز نے بین المذاہب ہم آہنگی کے عالمی ہفتے کے موقع پر اپنے پیغام میں کہا ہے کہ پاکستان ہمیشہ سے مختلف مذاہب، ثقافتوں اور روایات کا حسین گلدستہ رہا ہے۔
انہوں نے کہا کہ پنجاب میں ہر شخص بلا خوف و خطر اپنی عبادات ادا کر سکتا ہے اور تمام مذاہب محبت، امن اور رواداری کا پیغام دیتے ہیں جو ایک فلاحی معاشرے کی بنیاد ہے۔ مریم نواز نے اقلیتوں کے حقوق کی حفاظت اور ان کے لیے مساوی مواقع فراہم کرنے کے لیے پنجاب حکومت کے عملی اقدامات پر بھی روشنی ڈالی۔
ان کے مطابق حکومت اقلیتی برادری کے لیے مالی معاونت، عبادت گاہوں کی مرمت اور اقلیتی تہواروں کے انعقاد کے ذریعے ان کی فلاح و بہبود کے لیے کام کر رہی ہے۔ انہوں نے کہا کہ "اختلافات ضرور رکھیں لیکن دین کی تعلیم اور تہذیب کا دامن نہ چھوڑیں۔ عقائد کا احترام اور ہم آہنگی کو فروغ دینا ہی پائیدار امن و ترقی کی ضمانت ہے۔"
وزیراعلیٰ نے عوام سے محبت، بھائی چارے اور امن کا پیغام عام کرنے کی اپیل کرتے ہوئے کہا کہ ایسا معاشرہ تشکیل دیں جہاں انتہا پسندی کی گنجائش نہ ہو۔
