لاہور : محکمہ موسمیات نے ملک کے مختلف علاقوں میں بارش اور برفباری کی پیشگوئی کی ہے۔ اسلام آباد اور اس کے گردونواح میں بارش کا امکان ہے، جبکہ مری، گلیات اور ان کے آس پاس کے علاقوں میں ہلکی برفباری متوقع ہے۔
محکمہ موسمیات کے مطابق ملک کے بیشتر میدانی علاقے سرد اور خشک رہیں گے، لیکن شمال مشرقی پنجاب، خیبر پختونخوا، گلگت بلتستان، کشمیر اور ملحقہ پہاڑی علاقوں میں جزوی طور پر آسمان ابر آلود رہنے کے ساتھ ساتھ چند مقامات پر گرج چمک کے ساتھ بارش اور پہاڑوں پر برفباری ہو سکتی ہے۔
لاہور، شیخوپورہ، سیالکوٹ، گجرات، گوجرانوالہ، راولپنڈی، جہلم اور چکوال میں بھی بارش کی توقع ہے، جبکہ بلوچستان کے بیشتر اضلاع میں موسم سرد رہے گا۔ سندھ کے بیشتر علاقوں میں موسم خشک رہے گا، جبکہ دیر، چترال، کوہستان، مانسہرہ، ایبٹ آباد اور بٹگرام میں برفباری کی پیشگوئی کی گئی ہے۔ آزاد کشمیر اور گلگت بلتستان میں بھی بارش اور ہلکی برفباری کا امکان ظاہر کیا گیا ہے۔
