واشنگٹن : امریکی حکومت نے یکم فروری سے میکسیکو اور کینیڈا پر 25 فیصد ٹیرف نافذ کرنے کا فیصلہ کیا ہے، جب کہ چین پر بھی 10 فیصد ٹیرف عائد کرنے کا اعلان کیا گیا ہے۔ وائٹ ہاؤس کی پریس سیکریٹری، کیرولین لیوِٹ نے بریفنگ میں بتایا کہ امریکی صدر ڈونلڈ ٹرمپ نے یورپی یونین کے خلاف ٹیرف لگانے پر ابھی حتمی فیصلہ نہیں کیا۔
مزید برآں، ٹرمپ نے اعلان کیا کہ 18 فروری سے تیل اور گیس پر بھی ٹیرف عائد کر دیے جائیں گے۔ ان کا کہنا تھا کہ سٹیل، المونیم اور تانبے پر بھی ٹیرف نافذ ہوں گے، اور یورپی یونین پر بھی یہ اقدام کیا جائے گا۔
ٹرمپ نے اس بات کا عندیہ دیا کہ ٹیرف کے نفاذ سے ممکنہ طور پر قلیل مدتی خلل پڑ سکتا ہے لیکن مارکیٹ کے ردعمل پر انہیں تشویش نہیں ہے۔ روسی صدر سے بات چیت جاری ہے اور وہ اہم اقدامات کی امید رکھتے ہیں۔
انہوں نے کہا کہ بائیڈن انتظامیہ کے دوران سرکاری ادارے کرپٹ ہو گئے اور وفاقی ملازمین بغیر کام کیے تنخواہیں وصول کرتے رہے۔ ٹرمپ نے کینیڈا کے بارے میں سخت موقف اختیار کرتے ہوئے کہا کہ ان کا رویہ اچھا نہیں رہا اور ٹیرف کے نفاذ پر کینیڈا، میکسیکو اور چین کچھ نہیں کر سکتے۔