لاہور : پاکستان کرکٹ بورڈ کے چیئرمین محسن نقوی نے دنیائے کرکٹ کا ایک منفرد ریکارڈ قائم کیا ہے، صرف 110 دنوں میں قذافی سٹیڈیم کا 99 فیصد کام مکمل کر کے نیا سنگ میل عبور کیا۔
چیئرمین پی سی بی محسن نقوی علی الصبح قذافی سٹیڈیم پہنچے اور مختلف فلورز اور ہاسپٹیلٹی باکسز کے فنشنگ ورک کا معائنہ کیا۔ انہوں نے باکسز کے سامنے لگائی گئی ریلنگ کے معیار کا جائزہ لیا اور سٹیڈیم کے ویو کا بھی بغور مشاہدہ کیا۔
محسن نقوی نے کام کی رفتار کو دیکھتے ہوئے فنشنگ ورک کو مزید تیز کرنے کی ہدایت کی۔ اس موقع پر، چیف آپریٹنگ آفیسر سمیر احمد نے سٹیڈیم کی تکمیل پر پیش رفت کے بارے میں چیئرمین پی سی بی کو بریفنگ دی۔
محسن نقوی کا کہنا تھا کہ فنشنگ ورک میں معیار کو ہر صورت یقینی بنایا جائے گا۔ انہوں نے مزید کہا کہ قذافی سٹیڈیم کی تکمیل قریب ہے اور وزیر اعظم شہباز شریف 7 فروری کو اس کا افتتاح کریں گے، جس کے بعد شائقین کرکٹ چیمپئنز ٹرافی کے میچز نئے سٹیڈیم کی جدید سہولتوں کا فائدہ اٹھا سکیں گے۔