دوحا: طالبان اور قطر کے درمیان افغانستان سے غیرملکیوں کے انخلا کیلئے معاہدہ ہو گیا۔
خبر ایجنسی کے مطابق قطری وزیر خارجہ شیخ محمد بن عبد الرحمان الثانی نے اپنے انٹرویو میں طالبان سے معاہدے کی تصدیق کی۔
رپورٹس کے مطابق کابل ائیرپورٹ سے چارٹرپروازوں پر غیرملکیوں کا انخلا دوبارہ سےشروع ہوگا اور کابل ائیرپورٹ سے قطر ائیرویز کی ہفتے میں دو چارٹر پروازیں چلائی جائیں گی۔ چارٹر پروازوں سے امریکا اور دیگر ممالک اپنے شہریوں کو افغانستان سےنکالیں گے جبکہ ان پروازوں کے ذریعے جان کےخطرے سے دوچار افغانوں کا بھی انخلا کرایاجائےگا۔
خیال رہے کہ امیرِ قطر تمیم بن حمد بن خلیفہ الثانی صدر جوبائیڈن کی دعوت پر امریکا پہنچے جہاں دونوں رہنماؤں نے تاریخی ملاقات میں مشرق وسطیٰ کی سیکیورٹی، افغانستان میں انسانی بحران اور مغربی ممالک کو توانائی کے ممکنہ بحران پر تبادلہ خیال کیا۔
ملاقات کے دوران امریکی صدر جوبائیڈن نے قطر کو امریکا کا اچھا دوست اور انتہائی قابل اعتماد اتحادی قرار دیتے ہوئے اعلان کیا وہ قانون ساز اسمبلی سے قطر کو غیر نیٹو اہم اتحادی کا درجہ دلوانے کا کہیں گے اور یہ بہت پہلے ہی ہو جانا چاہیئے تھا۔
غیر نیٹو اہم ترین اتحادی کا درجہ امریکا سے شاندار تعلقات کا طاقتور اظہار ہے جس کی بنیاد پر نیٹو اتحادی ممالک بھی اس درجے کے حامل ملک کو عزت اور حیثیت دیتے ہیں۔ اگر امریکی کانگریس قطر کو اہم ترین غیر نیٹو اتحادی کا درجہ دیتی ہے تو قطر کو امریکا سے خصوصی فوجی اور اقتصادی استحقاق حاصل ہو جائے گا اور امریکی اتحادی ممالک سے بھی تعلقات بہتر ہو جائیں گے۔
قطر نے افغانستان سے امریکی فوجیوں کی بحفاظت انخلا اور طالبان سے مذاکرات میں کلیدی کردار ادا کیا ہے جس کا امریکا معترف ہے اور اب روس کے یوکرائن پر ممکنہ حملے کے نتیجے میں پیدا ہونے والے توانائی کے بحران پر بھی امریکا کو مدد کی یقین دہانی کرائی ہے۔
واضح رہے کہ خلیجی ممالک میں کویت واحد ملک ہے جسے امریکا کا غیر نیٹو اہم ترین اتحادی کا درجہ حاصل ہے اور اب قطر دوسرا ایسا ملک ہو جائے گا۔
