واشنگٹن : امریکا نے ایک بار پھر واضح کیا ہے کہ ایرانی پاسداران انقلاب کو دہشت گرد تنظیم قرار دیا جا چکا ہے اور ایران کو اپنے نیو کلیئر پروگرام کا پھیلاؤ روکنا ہوگا۔ امریکی محکمہ خارجہ کی ترجمان ٹیمی بروس نے اس بات کا اعادہ کیا اور کہا کہ امریکا دنیا کی حفاظت کے لیے کام کرتا رہے گا۔
ٹیمی بروس نے حماس کو غزہ کی موجودہ صورتحال کا ذمہ دار قرار دیتے ہوئے کہا کہ امریکا اپنی پوزیشن پر قائم ہے اور دنیا کی حفاظت کے لیے مسلسل کوشاں ہے۔ انہوں نے مزید کہا کہ ٹرمپ انتظامیہ اپنے تمام فیصلے عوام کی اُمنگوں کے مطابق کر رہی ہے اور جو لوگ امریکا آنا چاہتے ہیں، انہیں امریکی قوانین کا احترام کرنا ہوگا۔
ٹیمی بروس نے اس بات کا بھی ذکر کیا کہ صدر ٹرمپ کے دور میں امریکا معاشی طور پر مضبوط ہوگا، اور جب امریکا مضبوط ہوگا تو دنیا بھی ایک بہتر جگہ بنے گی۔ جب ان سے سوال کیا گیا کہ ٹرمپ امریکا کو دوبارہ عظیم بنانے کی کوشش کر رہے ہیں جبکہ مقبوضہ کشمیر اور افغانستان میں لوگ بھی ان کی طرف دیکھ رہے ہیں، تو ٹیمی بروس نے کہا کہ لوگوں کو ٹرمپ پر مکمل اعتماد ہے، یہی وجہ ہے کہ انہیں دوبارہ منتخب کیا گیا ہے۔