ماسکو: پاکستانی نوجوان محمد بُرہان نے ماسکو میراتھن کامیابی سے مکمل کرکے پاکستان کی نمائندگی کا اعزاز حاصل کرلیا۔
محمد بُرہان ماسکو میراتھن میں پاکستان کی نمائندگی کرنے والے واحد پاکستانی تھے۔ انہوں نے میراتھن میں بھرپور شرکت کرتے ہوئے مقررہ فاصلہ کامیابی سے مکمل کیا اور بین الاقوامی سطح پر ملک کا نام روشن کیا۔
محمد بُرہان کی اس کامیابی کو پاکستانی نوجوانوں کے لیے ایک حوصلہ افزا مثال قرار دیا جا رہا ہے۔ ان کی کامیابی پر اہلِ خانہ، دوستوں اور مختلف حلقوں کی جانب سے مبارکباد پیش کی گئی ہے۔

نیویارک: اقوام متحدہ کی جنرل اسمبلی کے 81ویں اجلاس کے موقع پر سوشل بزنس، یوتھ اینڈ ٹیکنالوجی فورم کا انعقاد ہوا، جس میں پاکستان نے ڈیجیٹل ٹیکنالوجی، مالی شمولیت اور مستقبل کے مالیاتی نظام میں اپنے کردار کو اجاگر کیا۔

 وزیر مملکت اور پاکستان ورچوئل ایسٹس ریگولیٹری اتھارٹی کے چیئرمین بلال بن ثاقب نے فورم سے خطاب کرتے ہوئے کہا کہ ترقی پذیر ممالک کے لیے ٹیکنالوجی کے فروغ کے ساتھ مؤثر ضابطہ کاری بھی ناگزیر ہے۔

 انہوں نے کہا کہ پاکستان اب مستقبل کے مالیاتی نظام کے قواعد کی تشکیل میں بھی اپنا کردار ادا کر رہا ہے۔ 2018 میں پاکستان میں مالیاتی اداروں کو ڈیجیٹل اثاثوں سے لین دین سے روک دیا گیا تھا، تاہم اب اس شعبے کو باقاعدہ ضابطوں کے تحت آگے بڑھایا جا رہا ہے۔

 بلال بن ثاقب نے کہا کہ مقصد صرف سرمایہ فراہم کرنا نہیں بلکہ لوگوں کی صلاحیتوں میں اضافہ بھی ہے۔ مصنوعی ذہانت کو کسانوں، ڈاکٹروں اور اساتذہ کے کام سے جوڑ کر ترقی پذیر ممالک میں سہولیات کی کمی دور کرنے میں مدد لی جا سکتی ہے۔

 وزیر مملکت کے مطابق جس طرح موبائل فون ٹیکنالوجی نے ترقی پذیر ممالک کو لینڈ لائن کے مرحلے سے گزرے بغیر آگے بڑھنے کا موقع دیا، اسی طرح نئی ٹیکنالوجیز بھی روایتی مراحل کو عبور کرکے ترقی کی رفتار تیز کرسکتی ہیں۔

 انہوں نے زور دیا کہ مالی سہولیات سے محروم افراد کو معاشی نظام کا حصہ بنانے کے لیے ٹیکنالوجی اور مؤثر ضابطہ کاری کو ساتھ لے کر چلنا ہوگا۔

 فورم کی افتتاحی تقریب میں جنرل اسمبلی کے صدر، تیمور لیستے کے صدر، بھوٹان کے وزیراعظم اور نوبیل امن انعام یافتہ پروفیسر محمد یونس سمیت اہم شخصیات نے شرکت کی۔

اسلام آباد(تو صیف عباسی )آئی ایم ایف مشن آج کراچی سے اسلام آباد پہنچے گا، جہاں وزارت خزانہ کی معاشی ٹیم کے ساتھ پالیسی سطح کے مذاکرات پیر سے شروع ہوں گے۔

 ذرائع وزارت خزانہ کے مطابق آئی ایم ایف مشن نے سٹیٹ بینک حکام کی جانب سے ملکی معاشی کارکردگی پر دی گئی بریفنگ پر اطمینان کا اظہار کیا ہے۔

 ذرائع کے مطابق سٹیٹ بینک حکام نے آئی ایم ایف مشن کو زرمبادلہ ذخائر، مانیٹری پالیسی، درآمدات، فارن ایکسچینج، کرنٹ اکاؤنٹ خسارے اور براہِ راست غیر ملکی سرمایہ کاری سے متعلق تفصیلی بریفنگ دی۔

 سٹیٹ بینک کے مطابق پاکستان نے زرمبادلہ ذخائر 17 ارب ڈالر سے زائد رکھنے کا ہدف حاصل کرلیا ہے۔ مذاکرات کے آئندہ مرحلے میں پاکستان کی معاشی کارکردگی، مقررہ اہداف اور اصلاحات پر پیشرفت کا جائزہ لیا جائے گا۔

نیویارک:   نائب وزیراعظم اور وزیر خارجہ اسحاق ڈار کی بینن کی وزیر خارجہ کورین اموری برونیٹ سے ملاقات ہوئی، جس میں پاکستان اور بینن کے درمیان دوطرفہ تعلقات اور باہمی تعاون کے امور پر گفتگو کی گئی۔

 ترجمان دفتر خارجہ کے مطابق ملاقات کے دوران پاکستان اور بینن کے درمیان دوطرفہ سیاسی مشاورت کے قیام کی مفاہمتی یادداشت (ایم او یو)پر دستخط کیے گئے۔

 ترجمان کے مطابق ایم او یو کے تحت پاکستان اور بینن کے درمیان باقاعدہ سیاسی مذاکرات اور مشاورت کا فریم ورک قائم ہوگا، جس کے ذریعے دونوں ممالک باہمی دلچسپی کے امور پر تبادلہ خیال کر سکیں گے۔

 ملاقات کے دوران دونوں ممالک کے درمیان دوطرفہ روابط اور تعاون کو مزید فروغ دینے کے امکانات پر بھی بات چیت کی گئی۔

Deputy Prime Minister/Foreign Minister Senator Mohammad Ishaq Dar @MIshaqDar50 met Foreign Minister of Benin H.E. Ms. Corinne Amori Brunet on the sidelines of the 81st UNGA in New York.

The two Ministers signed an MoU on the Establishment of Bilateral Political Consultations… pic.twitter.com/pXehTWBCBv

— Ministry of Foreign Affairs - Pakistan (@ForeignOfficePk) September 25, 2026

پشاور: گورنر خیبرپختونخوا فیصل کریم کنڈی نے صوبائی حکومت پر الزام عائد کیا ہے کہ وہ پولیس کے اختیارات اپنے ہاتھ میں لے کر اسے سیاسی بنانے کی کوشش کر رہی ہے۔

پشاور میں گفتگو کرتے ہوئے فیصل کریم کنڈی نے کہا کہ صوبائی کابینہ نے چند روز قبل پولیس ایکٹ منظور کرنے کی کوشش کی، جس کے ذریعے صوبائی حکومت پولیس کے اختیارات اپنے پاس رکھنا چاہتی ہے۔

گورنر خیبرپختونخوا نے کہا کہ پی ٹی آئی ماضی میں پولیس کو سیاست سے دور رکھنے کی بات کرتی رہی ہے، تاہم اب پولیس کو سیاسی بنانے کی کوشش کی جا رہی ہے۔ ان کے مطابق نئے ایکٹ کے تحت حکم کی تعمیل کرنے والوں کو ترقیاں دی جائیں گی۔

فیصل کریم کنڈی نے کہا کہ خیبرپختونخوا پولیس دہشت گردی کے خلاف جنگ میں مسلسل قربانیاں دے رہی ہے۔ صوبے کے جنوبی اور ضم شدہ اضلاع میں امن و امان کی صورتحال بھی تشویشناک ہے۔

انہوں نے بتایا کہ خیبرپختونخوا پولیس نے حالیہ کارروائی میں دہشت گردی کی ایک بڑی کوشش ناکام بنائی، جبکہ سی ٹی ڈی نے ایک دہشت گرد کو ہلاک کیا۔

گورنر خیبرپختونخوا نے صوبائی حکومت پر مزید الزامات عائد کرتے ہوئے کہا کہ ماضی میں ٹائیگر فورس سے وابستہ افراد کو بھرتی کرکے اداروں کو نقصان پہنچایا گیا۔ انہوں نے پی ٹی آئی کی سیاسی سرگرمیوں پر بھی تنقید کی اور کہا کہ پارٹی کے پاس کوئی واضح ایجنڈا نہیں۔